Die Ewigkeit
Im Gartn bin i gsessn, da fallt's mir ein
was könnt eigentlich die Ewigkeit sein?
Wann wer alle Tag in d'Arbeit muaß
und dös natürlich ollweil zur gleichn Zeit,
is eppa dös die Ewigkeit?...
Oder wann i ewig untätig sei' müaßt
und sahat niamals mehr an liachtn Schein,
kunnt eppa dös die Ewigkeit sein?...
Wann oana aus dem Jenseits zruckkam,
der sagat uns Erdenbürgern ganz gwiß,
was eigentlich die Ewigkeit is...
Daweil i so dahinsinnier über d'Ewigkeit,
geht´s Kuchlfenster auf und die Olte schreit:
"A halbe Ewigkeit wart i scho' mit'n Essn,
hast heut auf's Einagehn vergessn?"
Das reißt mi aus mein Grübln wach,
schau auf d'Uhr, is eh erst zehn nach.
Was hat s'gsagt, sie wart a halbe Ewigkeit?
Ja die Red hat mi' ganz sakrisch gfreut,
weil is di kloa' Verspätung scho' die halbe Zeit,
oft was in die Ewigkeit wohl neama weit.