Naturwesen.at

Es is im Leben oft nur a Kloanigkeit,
mi gfreut's, mir gfallt's, hab's ohne Neid.
I schau mi halt um, schau frisch eini in Tag,
es zoagt si gwiß was, was i gern mog.
An Buschn Almbleamaln hab i so gern,
an Himml, übersaht mit leuchtende Stern.
An Sonnenaufgang, dazua a schöns Amselliad
und da Gruch, wann d'Hollerstaudn blüaht.
Die Tautröpferln, san's no so winzig kloan,
schein', wann's d'Sunn dawischt, wia Funklstoan.
Wann wo Kinder lachn, gfreut's mi scho',
a a jungs Vieh und recht potschert no',
oder gar a verspüte Bruat,
a flotte Musi, die oan geht in's Bluat.
Recht lebenslustig zu an Fest hingehn,
oder z'höchst alloan am Berg obn stehn.
An liabn Gruaß, wannst gehst und kimmst,
an echtn Trost, dens d' selm gern nimmst,
an guatn Freund und a freundlichs Wort,
a stills Platzerl, wo auf dich wer wart',
an frohen Sinn und an klaren Blick,
jo, so is mei' Lebn nia leer, zum Glück.