Ich mein ja nur
San mir z´langsam in der heutigen Zeit?
Ma hört nur olleweil, gschwind, gschwind.
Kam hast was Neu´s, is scho´wieder olt,
es schaut grad aus, daß ma neama mitkimmt.
Wo stehn bleib´n und über was nachdenken,
kimmt bei der heutigen Jugend neama an.
Sie wissen und können olls vü´besser,
nur uns Oltn laufat die neue Zeit davon.
Gibt a erfahrener Mensch an guatn Rat,
lachen s´dich nur aus die jungan Leut.
Unser Denkweis wa ganz oltvadarisch,
nur sie ham was glernt in der Schulzeit.
Auf was zammsparn is heut neama modern,
ma kriagt jo eh bei olle Kassn Kredit
und wann si sich neama recht ausgeht,
müassn die Oltn ols Guatsteher mit.
Oft oa sam recht groß, ham aber a Hirn
wia a Almhüttn, hoch obn und nix drein,
und hams´im Taschnrechner koan Strom,
wissen s nit, wia vü´daß is drei mol neun.
Wann s´eah´selbn die Nasn angrennt habn,
weil eahni Vorschläg a nit besser san,
wird´s Oltherbrachte a wieder gschätzt,
dann toan s´wieder genau so wia da Dat und d´Mam.
Schauts heut amol eini in a Mendschakamma
und jeder stellt fest und das is a wahr,
wann s´a no´so gstudiert und gscheit san,
tuan s´genau no´so, wia vor hundert Jahr.