Mir tramt oft...
Mir tramt oft, i kann wieder Schi fohrn
und steh mit die Brettln obn auf da Höh,
siach wieder wia früahra den Dachstoangipfl;
in gletscher mit sein ewigen Eis und Schnee.
Schau umi zan Grimming, eini ins Tote Gebirg.
Olle Gipfln trogn a schneeweiße Trocht,
i fühl mi so frei und bin glückselig,
ols hätt´s Gottvota für mi alloani gmocht.
So steh i do mitn Rucksock am Buckl,
herobn auf mein liabn Laweanastoan,
loß ma mei Gipfljausn guat schmeckn,
dawisch mi dabei, daß i vor Freud a wenk woan.
Dann spür i wia mi meine hölzern Roß
in oan Saus über d´Süd tolwärts ziagn,
durchi zwischn Latschnschöpf und Stoangwänd,
ziag i mei Spur im glitzernden Firn.
Und wia i munter noch so an schön Tram,
da trüabt si nia mei Gmüat, mei Sinn
gfrei mi ollimol und dank Gottvota,
daß i in so an schön Land dahoam bin.
von Herbert Grill sen.